Wara-wara rua-n udi-ra-mudi labo sahada marimba makabela angi. Kento mpara ba ede, udi-ro-mudi na-ne'e lao ngupa ngaha. Pala udi-ro-mudi ake wara ana-n. Ede-r nggahi kai-na labo sahada marimba :

"Ai-cina-e, tongguto'i wea-pu ana nahu ake, ku-ne'e-ne'e lao ngupa ngaha."

"Taho mpa, cina-e, nahu matonggu-n," cambe kai ba sahada marimba. Ede-ra lao kai udi-r-mudi ngupa ngaha di sori. Lao fou mena-ku karondo, kapanto, karisa ro kambo'o, sanggilo ro kanaca. Ede-ra cua rai mena kai-na isi sori ede awa moti.

Ntika na-eda mpara ba londe di moti, sa-mena-na uta isi sori na-wa'u-du lao mena awa moti. Ede-r nggahi kai londe di moti :

"Karente mqena nggomi daxmbe, kombi wara lalehe-na rasa ra dana-ta."

Ede-ra cua karente mena kai londe di moti ede.

Ntika na-eda mpudu ba dou malao puka jala. Ede mpara nggahi kai-na labo lenga doho-n :

"He dambe, kombi wara lalehe rasa ro dana-ta, ne'e karente mena kai londwe di moti ake, kapo de taho-ra ta-lao kada aka uma-ta."

Ede-ra hinti kai-na loja labo loja mpa, sarunde-na makarawe, sarunde-na mawese, sarunde-na magala.

Ntika na-eda-du ba nasi tote-kaju dou maloja-loja, makarawe-rawe, mawese-wese ro magala-gala, ede-ra boe kai-na genda.

Ntika na-ringa-ku mpa ba sahada marimba eli genda malai-lai pahu, ede-ra tu'u maka ro hambu-na weki-n. Ntika na-hina upa-ku ana udi-ro-mudi ra-tonggu-na aka-n de, ede-ra made lelo kai-na ana udi-ro-mudi ede.

Makento ba ede, ntika na-dula mpara udi-ro-mudi ede. Na-eda-ku ana-na wau-ra made lelo. Ede-r dosi kai-na :

"Hai cina'e, ba-bau-si hade kai-mu ana nahu ake?"

"Hai cina-e, wati poda-poda ra-sengaja wea-ku hade ana-m ede. Ra-ringa-ku eli genda tote-kaju, ede-ra tu'u rebo kai nahu, hina upa-du ana nggomi," ede-r cambe kai ba sahada marimba.

"Wati tarima-ku ba nahu rawi nggomi ake. Mai-ra ta-lao paresa-ku di palando," nggahi kai ba udi-ro-mudi.

Mai ka-ra ndede-n palondo ede mandadi sangaji di wuba ake. Ede-ra lao sama kai dua-na ede di palando. Nggahi kai ba palando :

"Au habar nggomi doho ake?"

"Wara ana lamada ra-kau-ku sandaka sahada marimba lamada ku-lao ngupa ngaha awa sori. Poku lamada na-wa'u mpudu made lelo ana lamada ra-hade wea-na ba sahada marimba," cambe kai udi-ro-mudi.

"Bune wa'u-si lampa rawi-mu sahada marimba, au-si supu-na ndai hade kai-mu ana lenga-m ake?" sodi kai ba palando.

"Tampu'u-mpu'u-na na-hidi mancoki-ku ade-ku maringa boe genda tote-kaju, ede-ra tu'u rebo kai lamada, hina upa-du ana udi-ro-mudi," cambe kai ba sahada marimba.

"Lao ou-pu nasi tote-kaju ede!" Nggahi kai ba palando. Ede-ra lao ou kai, mai kai tote-kaju.

"Ba bau supu-na ka-eli kai-mu genda?" sodi kai ba palando.

"Bune-ku da boe kai-ku genda labo eda-ku dou maloja, makarawe-rawe wali ro mawese ro magala, ede asal-na ne'e boe kai-ku genda," cambe kai ba tote-kaju.

Nggahi kai ba palando :

"Lao ou-pu dou mamoti jala ede!"

Ede-ra lao ou kai. Mai ra dou mamoti jala.

"Au supu-na, nggomi doho, ne'e eda ai-mu maloja-loja ro karawe-rawe ro mawese-wese ro gala?" sodi kai ba palando.

"Kambia ade lamada doho ba supu eda-ku sa-mena-na londe di moti makarente mena," cambe kai ba dou mamoti jala.

"Lao ou mena-punlonde di moti ede!" Nggahi kai ba palando.

Ede-ra lao kai ou. Mai mpudu londe ede.

"Au supu-na ndai karente mena kai nggomi doho?" sodi kai ba palando.

"Bune-ku da karente kai lamada doho, eda-ku kanaca ro kambo'o, karondo ro kapanto, karisa ro sanggilo mangge'e mena di sori rai londo mena di moti. Ndadi kacai-du ba lamada doho lalehe rasa ro dana, ede asal karente kai lamada doho." cambe kai ba londe di moti.

"Lao ou-pu karondo ra kapanto, kanaca ro kambo'o, sanggilo ro karisa!" Ede-ra nggahi kai ba palando.

Ede-ra lao ou kai. Mai-ra sa-mena-na isi sori ede.

"Au supu-na. nggomi doho, mangge'e di sori lao rai mena awa moti?" Sodi kai ba palando.

"Bune-ku da lao rai kai lamada doho labo ra-fou ngaro ba udi-ro-mudi, ede lao rai kai awa moti," cambe kai ba isi sori ede.

"Nggara na-ndede sara, ncara wa'u ndai-mu, udi-ro-mudi." ede-ra nggahi kai ba palando.

Kapo ede ra-tarima-na ba udi, ana-n ede mamade upa ba sahe. Ede mpara cumpu na

 Di ambil dari :
Jonker, J.C.G..Bimaneesche Teksten (Mpama Mbojo).2004.Nusa Tenggara Barat

 

Wara-wara rua-na dou madaju. Nggahi kai ina-n :

"Lao ja-ra ngupa dei ru'u ngaha ro nono ndai!"

"Taho mpara lao te'e-ku tamba," cambe kai ba La Daju.

Ede-ra ndawi kai-na tamba, wa'u-ra cumpu ndawi-na tamba ede, lao kai-na te'e ese doro. Wa'u-ra te'e-na ai mambia, ai masidi na-lao-ra tio tamba-na ede. Ntika na-eda mpara janga peo, na-wau-ra bini tamba-na ede. Nggahi kai La Daju :

"Au mai lu'u-na di tamba nahu binata ake. Lao losa mena!"

Ede-ra hengga kai-na ncai tamba-na ede. Losa ngemo mena kai janga peo ede. Ede-ra cafi kanira kai ta'i-na di ade tamba ede, ede mpara dula-na di uma-na.

"Be-si uta ra-wa'a-mu, Daju'e?" Sodi kai ba ina-na.

"Wati wara-na ita ina-e, janga peo mpa, na-bini sara'a-ku tamba nahu aka-n de," cambe kai ba La Daju.

"E tongge randa-e, ba bau ne'e lao hori kai-m peo ede mancewi taho, sa-kura-kura-na co'i-na sa-bua sa-suku ro waura," nggahi kai ba ina-n.

"Nahu wati bade-ku nggali co'i-na peo ede, ede-ra i'a ra kaporo kai lamada, nggara na-lu'u wali sara'a nai-s, ku-lembaku sa-mena-mena-na mawara ede," cambe kai La Daju.

Ntika, bala ai sidi, na-lao wali-ra di tamba-na, ntika na-eda-du maju na-wa'u-ra bini sampake di ade tamba-na.

"Au mai lu'u mena-m nggomi doho di ade tamba nahu, janga peo mataho, nggahi be ina-ku, losa mena nggomi doho," nggahi kai ba La Daju.

Ede-ra hengga wea kai ncai-na, ede-ra losa kai maju ede, ede-ra La Daju lao dula-n di uma-na. Sodi kai ba ina-na :

"Be-si peo ra-wa'u-mu, Daju'e?"

"Wati wara-na peo, maju mpa mamboto aka-n de," cambe kai ba La Daju.

"Ede, bakai-ku maju ede?" Sodi kai ba ina-n.

"Ku-wa'u-ra hori mena, nggahi ba ita ina, peo mataho," cambe kai ba La Daju.

Ede-ra kaporo kai ba ina-n ba supu da weha-na maju. Nggahi kai La Daju :

"Ede-ra kaporo ina-e. Nggara na-lu'u wali sara'a nai-sa, ku-wa'a mena-ku ba nahu."

Ntika, bala ai sidi, na-lao wali-ra di tamba-na. Na-eda mpa sa-bua Longga makidi di ade wudi tamba-n, dese-na ese woha ai. Nggahi kai ba La Daju :

"Ai binata, au rawi-mu lu'u di tamba nahu. Maju mataho nggahi ba ina-ku. Kapo ma ai ake ku-sanggapi wea-ku edi to'i-m ake, ne'e wa'a-ku ina-ku."

"Ai Daju-e, ai-na kancoki-mu nahu, nahhu ma-ufa nggomi kai sampari malabo jalitu," cambe kai ba Longga.

"Au one-na sampari ede ro au one-na jalitu ede?" Sodi kai ba La Daju.

"Indo kapo one-na ba sampari ede, nggara turu kai-sa dou, na-made lalo mpa, nggara ne'e sara kamori wali, kabe kai-ku tajo-na ede. Indo kapo one-na jalitu, nggara ta-ufi sara, na-ringa sara ba dou, mambaju ro matunti ro au-au mpara karawi-na, na-wi'i-ku rawi-na ede, na tu'u mpa'a lenggo," cambe kai ba Longga.

Nggahi kai ba La Daju : "Nggara na-ndede-s, ca-arapudu sampari malabo jalitu ede!"

Ede-ra mbei-kai ba Longga ede sampari malabo jalitu. Ede-ra hori kai-n Longga ede ba La Daju. Wa'u ba ede La Daju na-dula ja-ra di uma-na.

Raka-du di woha ncai, ntika na-eda mpara ompu mafati rui rangga. Ede-ra ufi kai-na jalitu ba La Daju. Na-ringa ba ompu eli jalitu ede, ede mpara tu'u maka kai ompu ede labo rebo-n mpa. Na-wa'u-du pule sara'a rui rangga aka-n de maka ro mpa'a kai ba ompu. Wati-du bae-bae-na ruku ro rawi ompu ede ba lalai ade-na maringa eli jalitu.

Ntika na-eda mpara ba La Daju rawi ompu ede, wati-na iu-na weki-na hina ba rui rangga, na-wa'u lelo sara'a edi ro sarumbu-na, wati iu-na ba ompu, na-naha-naha seke mpara mpa'a-na. Ede-ra dengga kai ba La Daju ma-ufi jalitu.

Ntika, na-wa'u mpudu dengga eli jalitu, ompu aka-n de, wati-du wa'u-na doho. Ede mpara maru sarenga-na di wawo rui mamboto ede. La Daju dula-r di uma-na. Ompu aka-n de wati-du wa'u-na kone kiri weki saraka mbia ai.

Ede-ra nggahi kai wei-na ba ompu :

"E dambe, lao tio ja-pu ama-mu maralao fati rui, ba bau wati ntene kai-pu mai-na saraka mbia ai ake, kapo de lao tio-pu!"

Ede-ra lao kai ana doho-n aka sera lao fati kai rui ba ama-n. Ntika na-eda-ku ama-na ede wunga maru sarenga-na ese wawo rui.

"Ai ama-e, ba bau-si nggomi, mu-pili loko-mu-ro?" Sodi kai ba ana doho-na.

Nggahi kai ba ama-na : "Wati pili loko nahu. Wara La Daju ma-ufi jalitu aka-n de, ede-ra tu'u rebo kai nahu. Wati romo iu-ku hina ba rui rangga sarumbu-ku. Wa'u mpudu dengga ufi-na, wati-du wa'u-ku nahu makiri weki, ede-ra ne'e maru kai-ku ese wawo rui ake."

Ede-ra kalei kai ba ana doho-na ede, lao wa'a lalo-ku aka uma Ruma Sangaji. Labo nuntu mena kai sa-mena-mena-na ra-rawi La Daju. Ede-ra kaporo kai Ruma-t Sangaji labo La Daju :

"Lao oou-pu binata ede! Bune-ku pahu-na ndai kancoki kai-na dou matua ake, kapo ede lao ou."

Nggahi kai ba ompu : "Nggara ta-mpabua-sa ou, te-leto pete wa'u-pu lamada di ri'i woha ake!"

Ede-ra lao ou kai La Daju. Mai kai La Daju di tando Ruma-t. Nggahi kai Ruma-t :

"Bune-ku-si ne'e kancoki kai-mu ompu ake nggomi Daju-e?" Na-wa'u-du winte-winte mena sarumbu-n ake."

"Wati wara lamada ma-ra-kancoki ompu. Lamada ku-ufi ndai-ndai-ku jalitu ake, ndake-ku ra-ufi ba lamada," cambe kai ba La Daju.

Ede mpara ufi-na ba La Daju. Ede-ra ringa kai ba Ruma-t ro sa-mena-mena-na dou madoho ede. Na-cua-cua tu'u rebo mena mpa. Ndai Ruma-t maseke poda rebo. Kone ompu ra-diki pete aka-n ede na-ne'e-ku bisa ai ra-diki kai sarumbu-na. Eda ndede ba La Daju, ede mpara lao rai-na di uma-na, na ne'e ra cili weki ese pamoka-na.

Ntika, na-wa'u mpudu dengga jalitu, na-cua-cua iu mena mpada di weki-na. La Daju wati-du wara-na. Nggahi kai ba Ruma-ta :

"Lao hade wea-pu La Daju!"

Ede-ra lao kai dou masabune-bune mboto lao di uma La Daju.

Ntika na-eda mpara ba La Daju mai dou mamboto malabo daha mena, ede-ra doho ao kai ba La Daju watu ese tantonga pamoka-na. Ede-ra wonto kai-na sampari, turu sa-bua-bua kai ba La Daju. Ede-ra cua made repa kai-na dou mamboto ede. Ndadi wara sa-bua ro dua-n da hina ba turu, ede malao rai ngge'e ada wali labo Ruma-t ro nggahi-na :

"Na-wa'u-ra made mena dou maralao, ntika-ntika na-mbo'o mpa di sarei La Daju."

Ede-ra kananu kai ade Ruma-t Sangaji. Wara pala bisa-r guna-na La Daju ake. Labo nggahi Ruma-t :

"Lao wa'a wea-pu peda sangaji kai nahu ake, tanda-na wati-du ndai hade, nde pala kau-pu kamori mena dou maramade ncau ede!"

Ede-ra lao kai dou malao wa'a peda sangaji kai. Eda kai ba La Daju. ede mpara londo ao kai-n ba La Daju ro sodi-na :

"Au habar wa'a kai-mu peda sangaji kai ede?"

"Wati-du ne'e hade nggomi, na-kangampu wea-du ra-ncara-mu, nde pala kamori mena wa'u-pu dou maramade ake," cambe kai ba dou ede.

"Taho mpa." Nggahi a La Daju.

Ede-ra kabe sa-bua-bua kai tajo sampari-na, ede-ra tu'u mena kai dou maramade aka-n de, na-wa'u-ra mori mena.Ede-ra lao kai La Daju ngge'e ada di Ruma Sangaji, malao raho kangampu ro na-suju ro nemba hawo ra ninu Ruma-t. 

Ede-ra kandadi kai ba Ruma-t Ruma-t Bicara La Daju ede. Ede mpara cumpu na.

Wara-wara rua-na dou mampina sa-uma-uma. Mpinga ama-n, mpinga ina-n, mpinga ana-n, mpinga ada-n, ada siwe-na.

Wara di ade ai sa-nai, ana-n ede na-lao tonggu mbe'e mangaha di tolo. Mbe'e-na ede wara tolu mbua. Ntika na-wara mpara dou dua-na malampa, mane'e lao di Rasa Kolo. Ede-ra sodi kai-na ana dou ede: 

"E nggoke, be-ku ncai malao ese Kolo?"

Ede-ra cambe kai-na ba ana dou ede :

"Mbe'e mbo ake mbe'e ama-ku, mbe'e wine ake mbe'e ina-ku, mbe'e to'i ake mbe'e ndai-ku."

Ede-ra ndai ringa kai cambe ana dou ede ba dou aka-nde.

"Na-mpinga-ku pala lako ake, mai-ra ta-lao kada lampa!"

Di kontu dou ede, na-dula ja-ra ana dou ede di uma-na, pala ina-na wunga medi-na kafa. Ede-ra nggahi kai ba ana-n:

"Ai ina-e, wara dou dua-na aka-n de masodi lamada, cou mantau mbe'e ngena-m ede ; ede-ra cambe kai ba lamada; mbe'e mbo mbe'e ama-ku, mbe'e wine mbe'e ina-ku, mbe'e to'i mbe'e ndai-ku."

"Ai ana-e, ede-du boco-si boco, boro-si boro, sura wara ndai salongi kai cada mboko ama-m," cambe kai ba ina-na.

Ntika, wati-pu sa-bune. Na-rongga ja-ra ama-n watu doro. Ede-r nggahi kai ba wei-na:

"Ai Ama La Dambe. Na-loa poda nggahi ro e dou ba ana-mu ake, na-nggahi-ku : medi au maboco-si boro ndede, nde cambe kai ba nahu ; Ede-du na-boco-si boco kada, sura wara ndai salongi kai cada mboko ama-m."

"Nggahi au maturu karawi lako ndede, bune ai nahu mane'e angi labo La Mpano? Bakai-ku binata ede?" Cambe ro sodi kai ba rahi-na ede.

Ede-ra lao ngupa kai-na La Mpano, pala La Mpano wunga mbaju-na mubu. Ne'e nggahi kai ba Ruma-na : :Ai Mpano, nggahi pua-mu aka nahu mane'e angi labo nggomi, binata ke. Loa poda-ra kurewe asa-m!"

"Ai Ruma-e, kone poda mpoa lamada ada dou masampuru Ruma, wati poda-poda ca'u-ku ndu'u mubu di nocu-nocu," ede-ra cambe kai ba La Mpano.

Ndede-ra nuntu ro mpama-na dou mampinga sa-uma-uma.

 Di ambil dari :
Jonker, J.C.G..Bimaneesche Teksten (Mpama Mbojo).2004.Nusa Tenggara Barat